IMPUN BAH MEKONAN 5 RANI SEMAKUNG NAYUH.

TANGGUH WARAH;

Sai dipercaya isini lamban (pengayunanni batin sangun tian rua jong minggoman) nangguh ngehaguk sai hadir tesemuka sai jak tiundang dikala dibi jeno haga nutuk impun bah mekonan jak kiri kanan ni lamban serta minak muari sai pepatutni haga ngejunjung tayuhan sinji (nangguh sinji wat sai ti tuju/tumpakni tangguh umpamani jama radin menguk, batin sangun dll.) mani sifatni lain pengumuman.

Na tabik pai sekindua haga nagguh sanggan mecutik kik pak di pesekam pai tumpak ni tangguh, na dipangkalko nutukanko pengayunanni BATIN SANGUN dilambanji, na ajo neram dikala bingi sinji jak di rik-rik i (dicawako) sanak pura dilambanji na lain dia neram rumpok kik berupa anjau silau injuk selamani no atau marok pulalimbu injuk sai radu.

Dipangkalko injuk bagini sekindua haga buwarah serta becerita ngehaguk neram rumpok sai tesemuka dikala bingi sinji na ria kik nutukanko warahni batin sangun tian rua jong minggoman dilambanji, na ria kik radu sebulan ditanno ria kik injuk Ahmadji serta rik keruani jak buwarah ngehaguk tian rua jong minggoman na ria kik nutukanko sai warahni sai mesanak jak ngicik lalang begurau ngehaguk sanak sai diunggak kik pak di Nur pai pemangkalni, nutukanko warahni sai mesanak na tian sai mesanak jak bubanggan serta burecaka disai mupatut, haga nutukanko dikerintokan ni rik kerimpakni tian sai mesanak.

Selanjutni jak isan kik nutukanko warahni sai mesanak na watdo dia sirok pedom rencaka ni tian sai mesanak na radu megegai ngelambung di melesai, nutukanko warah ni sai mesanak mawek dia kik dapok haga ngelajuko rencaka sinji haguk tian diunggak mak lain haga buserah saddo jama neram rumpok sai metuha.

Semenjak nerima warah ni sai mesanaka mehanjak serta nerima saddo dia injuk batin sangun tian rua jong minggomanlaju kik pak disekam sang muarian, na radu wat seminggu sai radu liyu bagini sai mupatut dilambanji jak munggak sa muneh ngekebelongko sai warahni sai mesanak neram rumpok serta bubanggan serta berencaka disai mupatut na radu megegai ngelambung dimulesai kik nutukanko di pulidanganni rencaka ni tian rumpok dikala dinana radu sampai di janji semaya na seno sa na nepat di rani Kemis tanggal 10 bulan hadapji.

Na tapi dilom disan ria kik janji semaya senoampai irak-irakni hati sekam rumpok sang muarian saddo ria lain dia janji semaya seno kik haga jadi benanganni rencana neram rumpok , na kinttu bang kittu nihan wat halangan sai mubalak na ria kik guaian ni minak muari sai mepatut na mak cigani janji semaya seno ti ija ataupun ti udiko neram rumpok.

Na seno dia tangguh sekindua haguk peserumpok sai wat tesemuka dikala bingi sinji sekam rumpok laju kik pak disekindua sai jak nyemuka ko tangguh, haga lamon-lamon kilu mahap na riakik adu ganjorni rencaka neram rumpok sai wat radu tesemuka dikala bingi sinji, na seno dia tangguh sekindua disang lengkedoh seno mawek kik mekejung.

JAWABNI TANGGUH WARAH JAK BATIN SANGUN;

Selesai nangguh maka tangguh diatas dijawablah ulehni batin sangun jeno yaddo dia jawabni :

Payu pun radu negis dia sekindua nutukanko titangguh pesekam diampai karu, na ria kik puson son ni neram rumpok dikala bingi sinji dilamban sinji na haga watdo dia warah serta cerita pesekam nutukanko pengayunanni batin sangun tian rua jong minggoman dilambanji, na ria kik adu wat sebulan di tano na ria kik Ahmad ji serta rik kerua ni na jak buwarah ngehaguk batin sangun tian rua jong minggoman ani pesekam, semenjak ni nerima warahni sai mesanak ani pesekam mehanjak serta nerima sado dia batin sangun tian rua jong minggoman laju kik pak di sekam sang muarian ani pesekam dikala karu, naselanjutni jak isan adu wat seminggu sai radu ani pesekam ria kik sai patutni sekam rumpok jak dohji ani pesekam jak munggak ngecumbuko sai warahni sai mesanakneram rumpok sai didohji ani pesekam. Injuk bagini tian rumpok sai pepatutni dikala dinanajak bubanggan serta becerita diunggak adu megegai ngelambung dimulesai ani pesekam, kik nutukanko pelidanganni rencaka ni tian rumpok ani pesekam adu sampai di janji semaya na riakik janji semaya seno yaddo dia meto di rani kamis sai tihadapi tanggal 10 bulan sinji ani pesekam.

Na payu adu maklumserta paham do dia di ujud maksudni tangguh pesekam diampai karu, na injuk bagini sekam rumpok laju kik pak disekindua, na injuk bagini sekam rumpok laju kik pak di sekindua sai tumpakni tangguh na mawek kik kebok dihati aga ngemahafko ya na serta janji semaya sai radu dipubanggan tian rumpok mawek hak aga sangkut berebatni disekam rumpok, na patut saddo dia janji semaya senona haga mejongdo dia aga nutukanko sai radu di rencaka ni tian rumpok kala dinana.

Na seno dia uloh timbalni tangguh pesekam haguk sekindua diampai karu kittu wat haga bubuh lapokni tangguh na mak cigani disemukako peserumpok do....

Bubuh lapokni tangguh masalah cancang gimbung ni guayan jak isini lamban sai dipercaya jama batin sangun tian rua jong minggoman isi ni bubuh lapok tangguh seno masalah guaian sai haga tihadapi injuk melaway, kepancung, nyelimpok, napai, serta betetikolan daleh ngelemang isini yado :

Na payu haga wat muneh dia bubuh lapokni tangguh sekindua na riakik kemujoran mawek hak wat sangkut halangani ani peserumpok dijanji semaya seno, haga mejongdo diainjuk janji semaya sai radu dipubanggan tian rumpok dikala dinana.

Selanjutni jak isan kik ngangonko dilunikni guayan neram rumpok haga ngeperintokko sanak rua ji haga melunik saddo dia ibarat ni barang mak dapok tisadak ibarat ni tulisan mak dacok tibaca, na tapi dilom disan mawek kik dapok sekam rumpok sang muariyan ria sai haga ngejinjing guayan sinji mak lain haga beserah saddo dia jama peserumpok sai radu tesemuka dikala bingi sinji ya bebai bakas sanak ragahni, na mawek mubangik dihati sekam rumpok kik mawek sai mupatut ni neram rumpok sang muawriyan haga pu son-son (kumpul), sebalikni injuk bagini tian rumpok sai makung dapok tisemuka diguaian sinji sekam rumpok haga lamon-lamon kilu mahaf lain kik wat kati negbani atau ubah pindahni jak sai radu, mak lain kittu injuk guaian sinjji aga mecutik sado pai kik bunyini haga bedua malam jemahat kidang tisani neram rumpok di rani nyin metilah disegala langkah neram rumpok.

Selanjutni jak isan kik ngangonko di janji semaya seno radu mumbung di seminggu sai radu, patut saddo dia disegala pekarian radu kari tapi dilom disan mejaoh dia kik ria segalani makung hak wat tesengkurung na mak lain haga bebarong saddo dia neram rumpok ria ki berupa baban haga bebarong neramrumpok haga ngiwakkoya kittu bang berupa jingkawan haga bebarong neram rumpok ngejingkawiya sekam rumpok haga nyerah saddo dia jama peserumpok baik guaian sai dibah maupun sai diatasni na riakik diguayan seno. Na watdo dia nutukanko lehotni sai mupatut baituha dilom jeno na riakik watddo dia senagseri disang mecutik sai berupa siwok, irak-irakni hatini sanak kemeno haga manjinko pancung di sai ruani, serta haga guaianni bebai aga ngesesimpk napai bunyini. Na ria kik selanjutni jak isan neram haga nyerelai kik pak cutik na ria kik wat muneh lelupak ni tian dilambanji haga tisilau neram, dipangkalko negbuntuko sumor na serta watdo pepatianni sanak pura dilambanji sai dapok titikol neram rumpok na ria kik bunyini sanianni gulai, na selanjutni jak isan kik bingi ranini neram rumpok haga ngeguaikoya haga beserah jama peserumpok kapan juga ani peserumpok. Na seno dia tangguh sekindua disang lengkedoh seno mawek kik mekejung.

JAWABANNI TANGGUH JAK BATIN SANGUN;

Na payu ana pesekam diampai karu jak ngebubuh lapokko tangguh kik pak disekindua sai tumpakni tangguh, na kemujoran dia mawek hak wat sangkut halanganni janji semaya seno sai radu tipubanggan tian rumpok kala dinana, na dilom disan injuk bagini sekam rumpok sai radu tesemuka dibingi sinji nyansat nyenghaja saddo dia repa juga susun sapaini atau tunjuk tawaini peserumpok, na ria kik cancang gimbungni guaian neram rumpok sai dapok tesemuka haga ngeperintokko sanak ruaji sekam rumpok radu maklum, selanjutni jak isan na riakik nutukanko diguayan sekam rumpok sangun haga ngiwakko guayan. Api juga guaian ani peserumpok atau pun dijingkauan sekam rumpok sangun radu nyansat ngenghaja, na seno dia uloh timbalni tangguh pesekam haguk sekindua diampai karu.

____________________________________________________________________

Selesai acara seno marok biasa kik bahasani tabang tiyung/mawek pakai tehto lagi injuk marok biasa mungkin ngemarokko melawai disabah dipa-ipa kapan nyepok pancung, ya mungkin aga ngabing anau muneh negakko kelasa, nyani rangnyunjong pokokni melamon kidang timarokko biasa mawek pakai tumpakni tangguh.

DANG LUPA DILAPAHAN, INGOK JAMA SAI TINGGAL

Dilom menempuh kehurian tantu neram rumpok selalu busepok dipa-ipa juga jak sai wat dilom pekon, tetangga pekon di pematang, disabah diatar, diuma bahkan kik dizaman tanno ya sampai di kota, diluar provinsi rik lintas negara kik zaman tanno radu mawek lagi hak menjadi batasan, pokokni dipa juga rangni sai jelas rang busepok haga pakai ngelangsungko kehurian baik untuk keluarga, masyarakat, daleh minak muari seunyinni. Sampai keliling dunia juga mawek menjadi masalah.

Sai tinggal dilom pekon biasani nerusko generasi sai tinggal, baik rukun peranti, guayan serta tatacara hadat istiadat reno muneh ngejaga warisanni ulun tuha nyin selalu tetap terjaga, guayan tanggung jawab serta bebanni kik tinggal dipekon jama urusan minak muari radu tantu lebih berat jak minak muari sai tinggal diluar pekon, bahasa tannoni ya merantau, uleh ngeba tinggal dipekon seno disamping busepok jugani lagi latap jama kegiatan minak muari, haga ngetok ko rani, ngeluarko tenaga reno muneh pemikeran, sai jelas guayan dilom pekon lebih komplek jak sai tinggal diluar pekon. 

Sai kebetulan tanno masih beguai/kerja diluar pekon, merantau radu tantu semakungni wat relaya atau syareat hingga mencapai tempat disuatu perantauan, jalan menuju luar pekonno biasani dibekali pai jama pendidikan kik pak hak ya ikah cutik, ya lunikni pandai ngebaca rik pandai nulis, seno radu tantu menjadi mudal utamani, disan tantu muneh dia lewat jenjang pendidikan tisekulako, kik zaman tumbai ani datuk-datuk tian sekula rakyat SR, kik zaman tanno yaddo SD, atau sai bareh diatas tingkatanni, sai nyekula ko neram radu tantu uluntuha neram dipekon, jadi jak awalni neram ngebuka mata di pendidikan yado jak dimulai di pekon, sekula seno juga biayani uleh ulun tuha busepok, baik busepok didarak sabah atau kebun sehinggoni dapok ngehasilko belanja untuk kelangsunganni sekula neram reno muneh terkdang dibantu ulehni minak muari, ngimpukko belanja kik hak pak cutikya setulungan nyin neram menjadi sekula. Sehinggoni menjadi sekula mangsa pendidikan uleh pendidikan seno ngerubah cara bupiker serta busepok jadilah busepok cara rumpok, di luar pekon, ya mungkin jadi PNS, wiraswasta, pengusaha, politikus, manager perusahaan, direktur, marketing rik sai bareh-barehni mak nyak pandai lagi gelarni guayan kemeno, gelarni nyak jelema pekon mak pandai lagi nyak gelar-gelarni guayan kemeno, induh kik retini, sai jelas masih injuk diawalni jeno busepok pakai ngelangsungko kehurian. Ikkah carani gaoh sai sumang-sumang ya ujung-ujungni busepok intini ya penganik, belanja, daleh nyani anjung/lamban.

Sesuai jama judul sai wat diatas kusemukako jeno na watdo dia lehot kik pak cutik jak sekam sai wat dilom pekon jama minak muari sai wat diluar pekon, sekam sai tinggal dilom pekonji kik tata carani pandai na hak mudah ireh tehuot/tersanjung kik bahasa Indonesiani, sinji wat sai kusaniko jadi contoh jama minak muari jak luar pekon ngulang rasan jak kota ngulang kebayan kebetulan na hak nayuh muneh dipekon, na sekam sai dipekonji radu tantu kik seminggu semakung ni mulang jak kota na sekam sai wat dilom pekon radu timpuk/kumpul jak jaoh jak pasukni sampai jama hari H ni acara seno, mawek peritungan diwaktu, tenaga nguyunko guayai seno sebaga wujud penghargaan rik rasa suka cita jama minak muari sai jak luar pekon.

Jadi renolah minak muari sai tinggal di lom pekon ji selalu ngingok jama minak muari sai radu tinggal diluar pekon, bahkan risok tibimbing walau jarang tiliak ani pribahasa sa walaupun radu tinggal kik pak ya di luar negeri lagi risok juga kak marok ticawako, tidipa kapan ya mulang mit pekon daleh melamon lah, kuk rincini jak betungga atau lewat teleponpun risako ticawako daleh timarokko dilom pemarokan, na harapanni minak muari sai dipekon jama minak muari sai tinggal diluar pekon ya reno muneh lah risok ngingokko sekam sai tinggal dilom pekon.

Lehot jak minak muari di lom pekon, kik pak ya sukses diluar pekon dang kik sampai haga ngelupako skam sai wat dilom pekon kik dacok ya mulang minimal pesan dilom setahun, mungkin waktu buka/lebaran, dang menjadi alasan mani waktu sibuk, mak sempat ulehni guayan melamon, atau api lah sehinggoni betahun-tahun mak pernah mulang kuk sanak mak pandai sepa ajjong jama tamongni uleh ni mak pernah mulang na kik dacok senosa dang sampai terjadi, daleh mak cigani tiingokko bahwa semakungni lumpak mit kota, peranani minak muari, ulun tuha daleh sai bareh-barehni melamon terkadang ngimpuk ko belanja pececutik in dacok sekula gegoh di rumpok kadang nginjam dija dudi mani waktu ngirim belanja aga pakai nisanak sekula na mak muneh ngedok belanja terpaksa ditulung minak muari jadi peranni ulun tuha jama minakmuari melamon ngebani minak muari sampai menjadi injuk tano kondisini di luar kota gegoh baris dirumpok sai jak suku-suku bareh.

Jadi senolah sai berupa umanat rik lehot jama minak muari sai kebetulan tanno lagi wat di luar pekon berusaha di rantauan ria kik pak di kota pai rangni netokan dang zampai ngelupako asal muasal daleh silaturrahmi jama minak muari sai dilom pekon tinggal sesuai nihan injuk judul sai ku semukako di jenoni yaddo DANG LUPA DILAPAHAN, INGOK JAMA SAI TINGGAL. -------------------------------------------------------------------------------------------------------------------

Kekalau na jak ngebaca tulisan sinji tergerak hatini minak muari untuk mulang mit pekon sai mak pernah mulang, nguyunko pekon walaupun dirantauan mungkin jama pemikiran rik ide-ide sai cemerlang daleh menjalin tali silarurahmi jama minak muari sai tinggal dipekon, semata-mata maksud rik tujuanni untuk kebaikkan neram seunyinni daleh ngejalin tali silarurrahmi tetap erat, walaupun beda jenganan tentuni, mudah-mudahan lagi wat sai setuju, tabik pun jama kutti rumpok.