BETETANGGUHAN/BERASAN IV

TANGGUH BERASAN

Pun Ajo sekam 3-4 jongji nunggak dikala bingi sinji, dikayun tian rumpok sai tuha-tuha jaru kik pak dibatin sangun pai pemangkalni ria kik nutuk kon warahni tian sai mesanak sai didoh, kemujorando dia injuk ani peserumpok mawat dodia hak hada injuk warah ni sanak sai didoh laju kik pak di ahmadji pai pemangkalni serta rikni kerua na ria kik ani peserumpok sai diunggakji, ria kik bagini nurji radu jak buwarah sa muneh, na mejong do dia injuk wai nutuk buloran saddo dia injuk jingkawan sekam 3-4 jongji dikala bingi sinji.

Selanjutni jak isan ajo sekam 3-4 jongji munggak dibingi sinji dikayun tian sai tuha jaru laju kik pak Batin sangun beliawan haga ngimbangko pengatu jama peserumpok sai diunggaji harap kilu terimasai rencaka ni sai mesanak jama peserumpok sai diunggakji harap kilu terima sai rencaka ni sai mesanak ngehaguk peserumpok sai metuha, sekam rumpok aga klutumbu kik injukni penduyu, kilu sapai kik injikni cambay killu tanggang kik injuk kelindang pehaguk peserumpok sai diunggakji, na sekam rumpok sai jak doh ibarakni kerekai cambok diulok harap kilu selom dipeserumpok dikeperitukanni batin sangun tian rua jong minggoman, na heno dia tangguh sekindua disang lengkedoh seno mawat dia kik mekejung.

TIMBALNI TANGGUH BERASAN

Payu pun radu negisi dia bagi sekindua laju kik pak di tian rumpok kanan kiriji na riakik selikut tepokni tangguh laju kik pak dipesekam sai jak nyemukakon tangguh tapi dilom disan mawat dia sekendua dapok haganimbali di sai mupatut dipangkalko ajo bagini Nurji na mubalak kik hak badan tapi teduh pilehni mawat dia kik injuk dibalakni api lagi kik injuk pengaji segalani mawat injuk kelik kemoni dibah atau dilambanni, kik jeruan tetok taban kik nyecak tutu tapi dilamban mak kuyunan api lagi minak muari, pengija pengudi penyawa, penagu makung hak sai mupatut na dipangkalko puari ama kemamanni dilomni kebuyanan dipa mejaoh jak pergaulan , na seno dia kati ni peserumpok sampai kukidahisekam rumpok kittu penyana peserumpok haga melapang saddo kik sai Nurji radu diunggak na metangeh dia kik ria in peserumpok nginda-indakonya injuk pantuni sai tuha-tuha.

Udi runeh telileh, telintang dipumatang

Bela-bela pai pileh tah sesol jadi hiwang

Na heno pai dia kidah sekendua nutukanko tangguh pesekam disanglengkedoh seno.

NGEMUNYUK CAWA

Payu pun radu nengisi dia sekam rumpok sai didoh laju kik pak sekindua sai jak nyemuka kon tangguh na patut saddo dia peserumpok dipangkalko uleh rabai ruguini peserumpok sa juga, kittu bang sekam rumpok wat julingni angangonni peserumpok temon disan sekam rumpok mehanjak serta nerima tawaini sai mupatut ria kik injuk bagini sekam rumpok mawat hak ngiri nganan lagi, haguk peserumpok sekam rumpok sai jak doh haga ngatuh ko pengatu sa juga kintu nihan tecancang ani tuhan injuk keperitukanni batin sangun tian rua jong minggoman peserumpok sai diunggakji dia, aga ngepelantaranko ya na ria kiik injuk bagini na ria kik injuk bagini nurji dia haga menjadi kerintokanni sanak sai didoh ria kik Ahmad pai pemangkalni aga menjadi seser nyawani penyimbang kebikni batin sangun tian rua jong minggoman haga ngemiah matakon anok pelawa sai di doh haga menjadi tutukanni minak muari sai didoh laju di bah mekonanria kik pangkalni haga ngincokko ilis ni batin sangun tian rua jong minggoman, siserbani mecutik seno dia mulani sekam rumpok sampai ngemuyuk musorkon tangguh sekam rumpok sekam rumpok sai harap kilu senggayuk haguk sai metuha haga kilu tawai disai meralis ulehni Nurji ani peserumpok mawat hak segala kelik kemolni, serta budi pekertini sekam rumpok mawat hak nyimbang angangon sekam rumpok haga nyerah saddo jama tuhan sekam rumpok radu nyansat repa juga tawaini peserumpok sai mupatut injuk sekam rumpok sai jak doh injuk patutni ulun sai metuha.

Radu nguah dia pereh, dikudanni pangeran

Radu bela de pileh sekam mawat ngiri nganan,

Na reno dia sai tangguh sekendua di sang lengkedoh seno.

BALIK PENGATU

Na payu pun radu nengisi dia sekam rumpok kik pak disekendua ya sai tumpakni tangguh, na ria kik ani peserumpok nutukankon tangguh peserumpok haga ngatunkon di pengatu sa juga, na injuk haga keterimaan dsai rencaka ni sai mesanak, serta haga kesambut dijingkauan ni peserumpok na ria kik peserumpok radu nyangsat nyeghaja saddo dia rencaka ni sai mesanak serta jingkauan peserumpok. Na tapi dilom disan ana peserumpok aga ngilu tulung keperitukanni peserumpok kitu sekam rumpok haga ngelapok keperitukanni peserumpok sa juga na ria kik sekam rumpok haga ngebalik pengatu  jama peserumpok , jak sai merimbik mit di sai mebalak na riakik jak kanan hanekan guai hitungan atau dan jingkauan api lagi kik nutukanko adat perniti seram rumpok di sai radu-radu na riak berupa dau belanja seno dia sekam rumpok haga ngilu tulung jama peserumpok. Kittu nihan makung disan sai diangangonni peserumpok na reno dia nyin peserumpok nginda-indakonya nyin menjadi angangon peserumpok, na reno dia nyin jadi uloh timbal sekendua disang lengkedoh seno mawat dia kik mekejung.

BUBUH LAPOKNI TANGGUH (NGEMUNYUK CAWA)

Na payu pun radu nengisi dia kik pak disekindua tumpakni tangguh, na watdo dia tawaini peserumpok di sai mepatut, ana peserumpok aga ngebalik kon pengatu jama sekam rumpok jak merimbik mitdi sai mubalakni na api lagi kik dilom adat perniti neram rumpok sai radu-radu. Ana peserumpok ria kik berupa DAU belanja na sekam rumpok sai jak doh radu nyambut serta nerima tawaini peserumpok sai mupatut sekam rumpok sai jak doh sangun radu nyansat nyenghaja ria kik dau belanja seno sangun nutukanko adat perniti neram rumpok sai radu-radu . na ria kik dau belanja haga menjadi baban sekam rumpok sai jak doh haga ngilu ralis rulus ngehaguk peserumpok, ria kik memok mincikni bilangan ni dau belanja eno, na sekam rumpok mawat hak dapok haga neduhya na seno dia mulani sekam rumpok haga ngilu ralis serta meterang jama peserumpok. Na seno dia sai tangguh sekindua disang lengkedoh seno mawat dia kik mekejung.

TIMBALNI BUBUH LAPOKNI TANGGUH

Payu pun radu nengisi dia sekam rumpok nutukanko tangguh peserumpok disang pangkut seno, na haga wat do dia tawai sekam rumpok disai mupatut, na ria kik sekam rumpok haga ngilu tulung di baban atau adat perniti seno, na ria kik di adat perniti seno nutukanko lehot ni tian sai metuha wat rua macam, yaddo dia wat sai balak, rik wat sai lunik, peserumpok radu nyansat saddo dia haga ngiwakkonya.

Na tapi dilom disan ana peserumpok haga ngilu ralis ngilu terang dibilangandi dau belanja seno ilamatni do dia aga tibabanko ulehni sekam rupok ngehaguk peserumpok, tapi dilom disan sekam rumpok haga lamon kilu mahaf jama peserumpok, na ria kik bilanganni dau belanja seno mawatdo dia hak mejong di kepatutan mubiak saddo dia kik pak sekam rumpok sai nyemukakon ya, api lagi injuk bagini peserumpok sai haga ngusung ya, na riakik belanjani dau belanja seno sai lunik Rp. 100.000,- (seratus ribu rupiah) sai bala Rp. 10.000,- (sepuluh ribu rupiah) na reno dia timbalni sekam rumpok nutukanko tawaini tian sai tuha-tuha.

*** Dau balak gunani untuk honorni sai berasan, jak pihak ni Nur, dau lunik yaddo duit dau pakainini Nur maaf reganini nurno kik ti beli cawa kasarni. Mani ajo metudau. Kik kaoan metudau mawek semanda mawek maka mak pakai dau-an tergantung situasi.

BUBUH LAPOKNI TANGGUH (SAMBUNGAN NGEMUNYUK CAWA)

Payu pun ana sekindua jak nyemukakon tangguh disang mencutik ani pesekam na ria kik sekam rumpok haga ngilu ralis rulus serta meterang jama peserumpok dibilanganni belanja seno temon disan na radu watdo dia tawaini peserumpok disai mupatut serta timbalni disai meralis. Na ria kik peserumpok ngerasa mubalak saddo dia haga nyemukankon ya haguk sekam rumpok na ria kik ana peserumpok haga lamon kilu mahaf dipangkalkon bilanganni Dau belanja seno mawat mejong dikepatutan ani peserumpok na Rp. 100.000,- dau lunik, Rp.10.000,- dau balakni ani peserumpok

Na payu pun sekam rumpok radu mehanjak serta nerima saddo dia mebiak mak terasa biak ulehni balakni penulung peserumpok na ria kik melamon mak jadi rusak muincik mawek jadi hanjak na dipangkalkon sangun radu nutukankon rulungan hadat pestiti neram rumpok sai radu-radu na ria kik sai bunyini dau belanja.

Na tapi dilom disan repa dia inda-idndani ani peserumpok dau belanja sinji radu dapok sekam rumpok haga nyemukakon ya jama peserumpok na sekam rumpok haga ngilu ralis serta meterang-terang jama peserumpok, na seno dia tangguh sekindua di sang lengkedoh seno.

TIMBALNI BUBUH LAPONKI TANGGUH 2

Nam payu pun ana peserumpok jak ngebubuh lapokkon tangguh disang lengkedoh seno na ria kik dipangkalko tangguh pesekam na ngimbangko di ngeluleh, na riak kik kittu bang wat radu keusung dau belanja seno ani pesekam na sekam rumpok aga nyemukakon ya ani pesekam.

Na payu radu nengisi dia sekam rumpok di kiri kanan kemenji na laju kik pak nutukon di tawai ni tian rumpok di kiri kanan ampai karu na ria kik dau belanja seno kitu bang adu keusung ulehni peserumpok dikala bingi sinji sekam rumpok sai diunggakji haga ngeliak serta ngepebilang dibelanja seno sekam rumpok radu sanggun keterima di dau belanja seno. Na reno dia uloh timbalni tangguh pesekam disang lengkedoh seno.

NYERAHKO DAU BELANJA

Payu ajo pun injuk bagini sekindua jak buripa jama tian rumpok dikiri kanan kemenji na watdo dia tawaini tian rumpok disai mupatut. Na ria kik dau belanja seno radu adu wat keusung uleh sekam rumpok aga harap kilu terima serta diperbilang kittu bang injuk bilanganni di dau belanja seno makung mejong dikepatutan na sekam rumpok aga kilu mahaf.

Na sebalikni jak isan kitu bang belanja seno mejong dibilanganni cukup sukor kemujoran kemayangan kik ria. Na seno dia tangguh sekindua disang lengkedoh seno mawek dia kik mekejung

TIMBALNI NERIMA DAU BELANJA

Payu pun adu kesambut serta nerima disekam rumpok nutukankon di dau belanja seno, serta radu dipubilang tian rumpok di kiri kanan kemenji.

Nutukanko di bilangan ni cukup saddo dia dau belanja seno na haga kugacay sekam rumpok di unggakji serta nutukanko keperluan disanak bai sai diunggak laju kik pak di Nurji pai pemangkalni. Na seno dia sai uloh timbalni tangguh pesekam haguk sekindua diampai karu.
-----------------------------------------------

 

TANGGUH JANJI SEMAYA

Pun tabik pai sekindua haga ngebubuh lapok kon tangguh. Na ria kik jak pesan pengatu mit mendua pengatu pengatu alang kepalang tukung peserumpok nutukankon lehot umanat ni tian rumpok di doh laju kik pak dibatin sangun tian rua jong minggoman kitu bang radu selesai pubangganan peserumpok ngehaguk tian rumpok sai diunggakji ani beliau.

Na ria kik irak-irak ni hati ni batin sangun tian rua jong minggoman na haga ngeperintokkon injuk bagini ahmad ji aga sesemaya di mulejak. Na ria kik bingi ranini na rani kemis nepat di tanggal puluh bulan sinji. Na tapi dilom disan kitu bang wat sangkut halanganni sai mubalak ani peserumpok sai diunggakji janji semaya seno aga jadi genanganni rencaka neram rumpok.

Na reno pai dia tangguh sekindua nutukanko lehot umanat di tian rumpok sai pepatutni didoh dikala jeno.

TIMBALNI JANJI SEMAYA

Na payu radu nengisi dia bagini sekindua laju kik pak di kiri kanan kemenji ria kik pesekam jak ngebubuhko lapokn tangguh, na ria kik nutukanko lehot umanat ni tian sai tuha dilom dikala jeno kitu bang kitu nihan injuk bagini tian rumpok sai jak doh haga dia nutukkon kerintokan ni sanak rua ji na ria kik injuk bagini nurji metepok saddo dia didoh.

Na repa juga injuk sai diangon angon kon tian di doh neram rumpok aga nutuk sado dia, na ria kik adu wat nihan do dia tetok tingonni dibingi rani ani peserumpok sai jak doh sekam rumpok sai diunggakji mawek hak kebok halanganni na seno dia sai uloh timbalni tangguh pesekam ngehaguk sekindua diampai karu.

PENUTUPAN RENCAKA

Na payu pun na mehanjak serta nerima dia sekam rumpok sai jak doh, nutukankon ditunjuk tawai peserumpok diampai karu na ria kik mawek di dia hak wat aga sangkut halangani ani peserumpok na ria kik janji semaya sai radu ku semukakon sekam rumpok diampai karu.

Alamatni saddo dia janji semaya bingi rani sai tipakai neram rumpok, na selanjutni jak isan aga wat muneh de bubuh lapokni tangguh sekindua na ria kik neram rumpok dikala bingi sinji bubanggan serta burencaka disai mupatut, radu megegai ngelambung di mulesai injuk mawat dia kik wat siwak / juling ni rencaka neram rumpok.

Na tapi dilom disan kitu bang wat rencaka sai lagi tekeleleh, makung tipubanggan neram rumpok mak cigani jemoh perda disawaini neram rumpok sebusoran.

BETETANGGUHAN / BERASAN III

TANGGUH WARAH

Da’a ajo sekam rumpok 3-4 jongji munggak dikala bingi sinji ngahaosi neram rumpok keunyinni sai wat diunggakji laju kik pak tian dilambanji pai pemangkalni, tapi dilom disan skam rumpok laju kik pak sekindua ya haga beceita dipangkalko 2-3 bingi tanno sekam rumpok sai patut didoh jak diurau sai da’a tian rua jong minggoman, dikala dinana ngehaguk sekam rumpok ria kik adu sebulan sai tatu liyu adu setahun sai makung genok sekam rua jong minggoman ngayun sanak sinji burencaka kik pak Ahmad ji pai pemangkalni, dipangkalko Ahmadji radu mebalak ria kik irak-irakni hati sekam rua jong minggoman haga titepori dikerintokan ni sanak sinji ani tian rua jong minggoman dikala dinana ngehaguk sekam rumpok.

Kemujoran uleh tunjukni tuhan beserta berkat ni junjungan seram rumpok ria kik ahmadji jak munggak serta rikni kerua ni buwarah jama sekam rua jong minggoman ria kik ngewarahko sai jak jingkawauan ni tian sai mesanak. Ani tian rua jong minggoman dikala dinana jama sekam rumpok. Selanjutni jak isan watdo dia sai warahni sai mesanak dipangkalko tian sai mesanak jak ngicik lalang begurau jama sanak sai diunggakji kik pak di Nurji pai pemangkalni serta bubanggan disai mupatut. Lian dia kik pesan mendua kittu ngitung di merisok sai warah ni tian sai mesanak ani tian rua jong minggoman dikala dinana jama sekam rumpok.

Na reno dia pubanggan sai mesanak watdo dia sirok pedom sai mupatut radu megegai ngelambung dimulesai sai dacok dipubanggan tian sai mesanak tapi dilom disan mawat dia sekam sai mesanak dacok ngelanjutko rencaka jama tian sai diunggak ani tian sai mesanak. Kittu nyerah saddo jama peserumpok sai metuha ani tian sai mesanak, na seno dia kati unggakni sekam 3-4 jongji dikala bingi sinji dikayun tian rumpok sai tuha jaru kik pak di Batin Sangun beliawan pai pemangkalni aga ngekebelongko sai warahni sai mesanak sai didoh jama peserumpok sai diunggakji kik pak disanak sai dilambanji pemangkalni.

Semenjakni nerima warah ni sai mesanakna hebos ngerasa kurang dia sekam rumpok sai metuha tapi dilom disan na kelik ngelipat bingi dia sekam rumpok ngangonko aga ngehaosi peserumpok sai diunggakji ulehni rabai ruguini sekam rumpok kintu mawat kesambut dipeserumpok sai mepatut, tapi dilom disan kujingkawi sekam rumpok juga ngejimpangko disesabungan.

Seno dia kati unggakni sekam 3-4 jongji dikala bingi sinji kittu radu wat warahni sanak peserumpok sai diunggakji kemujoran dia kik ria na WAY NUTUK BULORAN dia sai jingkawan sekam rumpok dibingi sinji. Sebalikni jak isan kittu makung wat warahni Nur ji kittu lagi irak-irakni ria , ria kik Ahmadji angangonni sanak sai didoh sa ria, yaddo dia sekam 3-4 jongji munggak dikayun tian rumpok sai tuha jaru laju kik pak batin sangun beliawan haga NGEBAKAKKO TANGGUH SERTA NGEMULANKON RENCAKA jama peserumpok sai diunggakji, na seno dia tangguh sekindua disang lengkedoh seno mawat kik mekejung.



JAWABNI TANGGUH WARAH

Payu pun radu nengis bagi sekam rumpok kunyinni laju kik pak disekendua pai tumpakni tangguh, ilamat kik pak mawat dia kik dacok kutimbali sekendua disai mupatut namun dilom disan haga kutimbali juga diantakni sai kehingok dianggani sai mak lupa.

Na wat do dia warahni tian sai tuha-tuha dikala jeno na ria kik injuk bagini sanak sai dilambanji, na riakik di Nur ji serta rik kerua ni na radu wat rua telu bingi ditano jak buwarah sa munehjama puari ama kemamani sai diunggakji, na ria kiksai warahni sanak sai dilambanjina mejong do dia injuk warah ni sanak peserumpok sai didoh, repa juga warahni sanak peserumpok sai didoh na reno juga warahni sanak saidiunggakji na injuk WAY NUTUK BULORAN SADDO dia sai jingkawan ni peserumpok.

Kittu haga wat bubuh lapokni tangguh peserumpok mak ciga disemukako peserumpok do, na seno dia uloh timbalni pesekam disangklengkedoh ampai karu.

BETETANGGUHAN/BERASAN II

TANGGUH PERATONG

Na ajo sekam 3-4 jongji mungggak dibingi sinji ngehawosi neram rumpok keunyinni sai wat diunggakji laju kik pak sai wat dilambanji pai pemangkalni, dipangkalkon wat nihan lehot umanat sekamm rumpok pehaguk peserumpok lagi injuk selama ni no, na riakik irak-irakni hati sekam rumpok aga ngekicik dimulejak.

Kemujoran mawat hak ngebilang bingi rani wat do dia lehot umanat peserumpok sai diunggakji, ngehagako sekam rumpok sai jak doh haga munggak, na reno dia kati unggakni sekam rumpok telu pak jong ji dikala bingi sinji.

Kik ngangonko dibalakni jingkawan sekam rumpok laju kik pak disekendua di sai nyemukakon tangguh patut saddo dia tangguh sai butanggun tila besusun, tapi dilom disan bagi ni sekendua haga lamon-lamon kilu mahap jama peserumpok dipangkalkon injuk bagini sekendua pandai sa mawat apilagi kik biasa.

Selanjutni jak isan kik ngangonko di patutni jingkauan patut saddo dia sekam rumpok sai munggakji injuk bagini tian sai metuha tapi sekam rumpok haga lamon-lamon kilu mahaf dipangkalkon injuk bagini tian rumpok sai tuha lamon muneh rasani badanni tian rumpok (kurang sehat), selanjutni jak isan kik ngangonkon patutni jingkauan sekam rumpok patut saddo dia sekam rumpok sai munggakji di bubilang, kintu sekam rumpok sai munggakji mawat bubilang sekam rumpok haga kilu mahaf dipangkalkon sekam rumpok sangun makung hak bubiolang, dipa disampang jingkauan ni tian rumpok sai mupatut dikala bingi sinji apilagi kik ngepehampangko jingkauan.

Selanjutni kittu bang sekam rumpok sai munggakji radu kesambut dipeserumpok radu bubilang na lain dia sekam rumpok kik ngehunjakko lengkedoh sekam rumpok aytau kik ngucakko minak muari sai di doh radu bubilang atau pakatni mengampungan na jadi sai harap sekam rumpok aga kesambut di mejong disesedongan. Selanjutni jak isan kik ngangonko balakni jingkauan sekam rumpok nutuk kon peranti peranggu sai radu, nutukanko lehot umanat ni tian rumpok sai metuha kittu wat jingkawan sai mupatut ria kik hagangepekicik kati temuni sanak bai sanak bakas ria kik muli meranai aga budan lain dia kik besemaya di sebingi rua. Na patut saddo dia wat tanda penceciren sekam rumpok nandakon mintar jak anok jenganan sekam rumpok ria kik bebunyini kirim peratong, na ria kik rincini ngangas ngudut pak sang tetok, tembaku kik sang buok atau cambai pak sang helar, buah kik pak kebelah, kejujuni kik wat ajini pak cutik. Riaki berupa kanan hanekan rincini senang seri sang bitah rua sai radu butepin rik busani, reno muneh berupa pulung pakaian, kitu bang mawek keusung ulehni sekam rumpok na sekam rumpok kilu mahaf lain dia kik tipurincang, tiputetok, tipuhanggan, kejujuni kik ti pukurang. Kittu mak lain ulehniperi keperitukan serta kemawatan sekam rumpok sai didoh.

Sebalikni jak isan kittu bang wat keusung ulehni sekam rumpok ria kik bunyini kirim peratong, seno kirimni sai tinggal perantongni sai bujingkau haguk sanak pura sai diunggakji, beribu-ribu sekam rumpok harap kilu sanggun kilu terima haguk peserumpok. Na senopai dia tangguh sekendua disangalengkedoh seno mawat hak mekejung.

TIMBALNI TANGGUH PERATONG

Na payu radu nengisi dia bagini sekendua laju kik pak disekam rumpok sai wat dilambanj pai pemangkali. Lajukik pak tian sai tuha dilom.

Na watdo dia tawaini tian rumpok , na ria kik jingkauan peserumpok sai mupatut dikala bingi sinji injuk bagi ni sekam rumpok sai diunggakji mawek hak kebok hati aga ngemahafkon ya. Na selanjutni jak isan ria kik cancang gimbungni peserumpok sai munggak dibingi sinji radu kesambut disekam rumpok mejong disesedongan.

Na selanjutni jak isan ria kik bunyini peserumpok sai radu wat keusung ulehni peserumpok dikala bingi sinji, radu sanggun keterima disekam rumpok sai diunggakji, kittu wat nihan bubuh lapokni tangguh peserumpok kak serebok lagi mak cigani disemukako peserumpok do,

Na seno dia uloh timbalni tangguh pesekam disang lengkedoh ampai karu.

***Peratong tikurukkon dilapang lom dibagi-2 + buak nginom, dibagiko di minak muari kiri kanan  daleh wat muneh sai tiulohko cutik jama sai ngusung peratong.