BETETANGGUHAN / BERASAN III

TANGGUH WARAH

Da’a ajo sekam rumpok 3-4 jongji munggak dikala bingi sinji ngahaosi neram rumpok keunyinni sai wat diunggakji laju kik pak tian dilambanji pai pemangkalni, tapi dilom disan skam rumpok laju kik pak sekindua ya haga beceita dipangkalko 2-3 bingi tanno sekam rumpok sai patut didoh jak diurau sai da’a tian rua jong minggoman, dikala dinana ngehaguk sekam rumpok ria kik adu sebulan sai tatu liyu adu setahun sai makung genok sekam rua jong minggoman ngayun sanak sinji burencaka kik pak Ahmad ji pai pemangkalni, dipangkalko Ahmadji radu mebalak ria kik irak-irakni hati sekam rua jong minggoman haga titepori dikerintokan ni sanak sinji ani tian rua jong minggoman dikala dinana ngehaguk sekam rumpok.

Kemujoran uleh tunjukni tuhan beserta berkat ni junjungan seram rumpok ria kik ahmadji jak munggak serta rikni kerua ni buwarah jama sekam rua jong minggoman ria kik ngewarahko sai jak jingkawauan ni tian sai mesanak. Ani tian rua jong minggoman dikala dinana jama sekam rumpok. Selanjutni jak isan watdo dia sai warahni sai mesanak dipangkalko tian sai mesanak jak ngicik lalang begurau jama sanak sai diunggakji kik pak di Nurji pai pemangkalni serta bubanggan disai mupatut. Lian dia kik pesan mendua kittu ngitung di merisok sai warah ni tian sai mesanak ani tian rua jong minggoman dikala dinana jama sekam rumpok.

Na reno dia pubanggan sai mesanak watdo dia sirok pedom sai mupatut radu megegai ngelambung dimulesai sai dacok dipubanggan tian sai mesanak tapi dilom disan mawat dia sekam sai mesanak dacok ngelanjutko rencaka jama tian sai diunggak ani tian sai mesanak. Kittu nyerah saddo jama peserumpok sai metuha ani tian sai mesanak, na seno dia kati unggakni sekam 3-4 jongji dikala bingi sinji dikayun tian rumpok sai tuha jaru kik pak di Batin Sangun beliawan pai pemangkalni aga ngekebelongko sai warahni sai mesanak sai didoh jama peserumpok sai diunggakji kik pak disanak sai dilambanji pemangkalni.

Semenjakni nerima warah ni sai mesanakna hebos ngerasa kurang dia sekam rumpok sai metuha tapi dilom disan na kelik ngelipat bingi dia sekam rumpok ngangonko aga ngehaosi peserumpok sai diunggakji ulehni rabai ruguini sekam rumpok kintu mawat kesambut dipeserumpok sai mepatut, tapi dilom disan kujingkawi sekam rumpok juga ngejimpangko disesabungan.

Seno dia kati unggakni sekam 3-4 jongji dikala bingi sinji kittu radu wat warahni sanak peserumpok sai diunggakji kemujoran dia kik ria na WAY NUTUK BULORAN dia sai jingkawan sekam rumpok dibingi sinji. Sebalikni jak isan kittu makung wat warahni Nur ji kittu lagi irak-irakni ria , ria kik Ahmadji angangonni sanak sai didoh sa ria, yaddo dia sekam 3-4 jongji munggak dikayun tian rumpok sai tuha jaru laju kik pak batin sangun beliawan haga NGEBAKAKKO TANGGUH SERTA NGEMULANKON RENCAKA jama peserumpok sai diunggakji, na seno dia tangguh sekindua disang lengkedoh seno mawat kik mekejung.



JAWABNI TANGGUH WARAH

Payu pun radu nengis bagi sekam rumpok kunyinni laju kik pak disekendua pai tumpakni tangguh, ilamat kik pak mawat dia kik dacok kutimbali sekendua disai mupatut namun dilom disan haga kutimbali juga diantakni sai kehingok dianggani sai mak lupa.

Na wat do dia warahni tian sai tuha-tuha dikala jeno na ria kik injuk bagini sanak sai dilambanji, na riakik di Nur ji serta rik kerua ni na radu wat rua telu bingi ditano jak buwarah sa munehjama puari ama kemamani sai diunggakji, na ria kiksai warahni sanak sai dilambanjina mejong do dia injuk warah ni sanak peserumpok sai didoh, repa juga warahni sanak peserumpok sai didoh na reno juga warahni sanak saidiunggakji na injuk WAY NUTUK BULORAN SADDO dia sai jingkawan ni peserumpok.

Kittu haga wat bubuh lapokni tangguh peserumpok mak ciga disemukako peserumpok do, na seno dia uloh timbalni pesekam disangklengkedoh ampai karu.

BETETANGGUHAN/BERASAN II

TANGGUH PERATONG

Na ajo sekam 3-4 jongji mungggak dibingi sinji ngehawosi neram rumpok keunyinni sai wat diunggakji laju kik pak sai wat dilambanji pai pemangkalni, dipangkalkon wat nihan lehot umanat sekamm rumpok pehaguk peserumpok lagi injuk selama ni no, na riakik irak-irakni hati sekam rumpok aga ngekicik dimulejak.

Kemujoran mawat hak ngebilang bingi rani wat do dia lehot umanat peserumpok sai diunggakji, ngehagako sekam rumpok sai jak doh haga munggak, na reno dia kati unggakni sekam rumpok telu pak jong ji dikala bingi sinji.

Kik ngangonko dibalakni jingkawan sekam rumpok laju kik pak disekendua di sai nyemukakon tangguh patut saddo dia tangguh sai butanggun tila besusun, tapi dilom disan bagi ni sekendua haga lamon-lamon kilu mahap jama peserumpok dipangkalkon injuk bagini sekendua pandai sa mawat apilagi kik biasa.

Selanjutni jak isan kik ngangonko di patutni jingkauan patut saddo dia sekam rumpok sai munggakji injuk bagini tian sai metuha tapi sekam rumpok haga lamon-lamon kilu mahaf dipangkalkon injuk bagini tian rumpok sai tuha lamon muneh rasani badanni tian rumpok (kurang sehat), selanjutni jak isan kik ngangonkon patutni jingkauan sekam rumpok patut saddo dia sekam rumpok sai munggakji di bubilang, kintu sekam rumpok sai munggakji mawat bubilang sekam rumpok haga kilu mahaf dipangkalkon sekam rumpok sangun makung hak bubiolang, dipa disampang jingkauan ni tian rumpok sai mupatut dikala bingi sinji apilagi kik ngepehampangko jingkauan.

Selanjutni kittu bang sekam rumpok sai munggakji radu kesambut dipeserumpok radu bubilang na lain dia sekam rumpok kik ngehunjakko lengkedoh sekam rumpok aytau kik ngucakko minak muari sai di doh radu bubilang atau pakatni mengampungan na jadi sai harap sekam rumpok aga kesambut di mejong disesedongan. Selanjutni jak isan kik ngangonko balakni jingkauan sekam rumpok nutuk kon peranti peranggu sai radu, nutukanko lehot umanat ni tian rumpok sai metuha kittu wat jingkawan sai mupatut ria kik hagangepekicik kati temuni sanak bai sanak bakas ria kik muli meranai aga budan lain dia kik besemaya di sebingi rua. Na patut saddo dia wat tanda penceciren sekam rumpok nandakon mintar jak anok jenganan sekam rumpok ria kik bebunyini kirim peratong, na ria kik rincini ngangas ngudut pak sang tetok, tembaku kik sang buok atau cambai pak sang helar, buah kik pak kebelah, kejujuni kik wat ajini pak cutik. Riaki berupa kanan hanekan rincini senang seri sang bitah rua sai radu butepin rik busani, reno muneh berupa pulung pakaian, kitu bang mawek keusung ulehni sekam rumpok na sekam rumpok kilu mahaf lain dia kik tipurincang, tiputetok, tipuhanggan, kejujuni kik ti pukurang. Kittu mak lain ulehniperi keperitukan serta kemawatan sekam rumpok sai didoh.

Sebalikni jak isan kittu bang wat keusung ulehni sekam rumpok ria kik bunyini kirim peratong, seno kirimni sai tinggal perantongni sai bujingkau haguk sanak pura sai diunggakji, beribu-ribu sekam rumpok harap kilu sanggun kilu terima haguk peserumpok. Na senopai dia tangguh sekendua disangalengkedoh seno mawat hak mekejung.

TIMBALNI TANGGUH PERATONG

Na payu radu nengisi dia bagini sekendua laju kik pak disekam rumpok sai wat dilambanj pai pemangkali. Lajukik pak tian sai tuha dilom.

Na watdo dia tawaini tian rumpok , na ria kik jingkauan peserumpok sai mupatut dikala bingi sinji injuk bagi ni sekam rumpok sai diunggakji mawek hak kebok hati aga ngemahafkon ya. Na selanjutni jak isan ria kik cancang gimbungni peserumpok sai munggak dibingi sinji radu kesambut disekam rumpok mejong disesedongan.

Na selanjutni jak isan ria kik bunyini peserumpok sai radu wat keusung ulehni peserumpok dikala bingi sinji, radu sanggun keterima disekam rumpok sai diunggakji, kittu wat nihan bubuh lapokni tangguh peserumpok kak serebok lagi mak cigani disemukako peserumpok do,

Na seno dia uloh timbalni tangguh pesekam disang lengkedoh ampai karu.

***Peratong tikurukkon dilapang lom dibagi-2 + buak nginom, dibagiko di minak muari kiri kanan  daleh wat muneh sai tiulohko cutik jama sai ngusung peratong.

BETETANGGUHAN / BERASAN

TANGGUH PENGGEGIROK

Biasani tangguh sinji tisampaiko kak waktu haga berasan, biasani sebegitu neram sampai dirang berasan na disambut tian rumpok jak lumpak terus mejong di lapang luar sambil marok biasa, jak seno diurau tian mengan pai, jak mengan dikariko tian nginom kupi  sambil ngudut segitu lagi basani ngudut injuk radu tesengkurung unyin na waktuni sai lumpak jeno nagguh pertama gelarni tangguh penggegirok isi ni tangguh kurang lebih yado :

###### ------- ########

Na tabik pai SEKINDUA haga nagguh sanggan mencutik haguk peserumpok Seunyinni sai wat dija, laju kik pak dilambanji, ria kik pak di PESEKAM pai tumpakni tangguh.

Na ajo mengan radu, nginom radu, ngudut kik pak sekadarni na radu muneh, kittu ajo bingi radu mulai kiser merelom aga tibalin neram rumpok pai dia rencaka neram rumpok. Na ria kik sekam 3-4 jongji na munggak/lumpak dibingi sinji ngehaosi/ngehandosi neram rumpok kaunyinn sai wat dija, laju kik pak sai wat di lambanji pai pemangkalni.

Na lain dia sekam 3-4 jongji kik munggak dikala bingi sinji berupa anjau silau injuk selama ni no atau marok pulalimbu injuk sai radu, nakittua haga wat nihan dia lapahan sai mubalak serta jingkauan sai mupatut.

Kittu bang mawat sangkut halanganni ani peserumpok, aga wat nihan dia tangguh ni tian 3-4 jongji kak serebok lagi. Na sebalikni jak isan kittu bang lagi wat sangkut halanganni ani peserumpok, na ria kik injuk urawan ni tian dilambanji making letak tesengkurung disai mupatut, ria kik sai diuma making mulang sai dibah making cakak, na mak ciga diaretianni ti pepenah neram rumpok kak serebok lagi, na ajo bingilagi mehayu.

Na senopai dia tangguh SEKINDUA disang lengkedoh seno mawat dia kik tangguh SEKINDUA mekejung.

TIMBALNI TANGGUH PENGGEGIROK

Payu ana radu nengisi dia bagini sekindua, nutukanko tangguh pesekam disang lengkedoh ampai karu, ilamat kik pak mawat diakik dacok kutimbali Sekendua di sai mupatut, namun dilom disan na haga kutimbali juga di antakni sai keingok dianggani sai mak lupa.

Na ria kik SELIKUT TEPOK ni tangguh pesekam ngimbang ko dingeluleh, injuk bagini peserumpok 3-4 jong dikala bingi sinji, na munggak ngehaosi neram rumpok sai diunggakji laju kik pak sai wat dilambanji.

Haga watdo dialapahan sai mubalak serta tangguh sai mupatut ani pesekam na dilom disan wat do dia sangkut halanganni sai mubalak, ria kik urawan ni tian rumpok dilambanjji making tesengkurung di sai mupatut.

Na tapi dilom disan, injuk bagini tian rumpoksai making tesemuka dibingi sinji ngimbangko di rua cawa, yaddo dia mak ciga dia tiwewarahi neram rumpok kanah perda dijemohni, kittu wat bubuh lapokni tangguhpeserumpok kak serebok lagi mak cigani disemukako peserumpok do.

Na reno pai uloh timbalni tangguh pesekam haguk sekindua diampai karu.

###### ------- ########

Tangguh seno juga dijawab luwot ulehni sai pertama nagguh, biasani mani meramik sai munggak/lumpak maka tangguhno juga jeno tiparehko haguk tian 3-4 jong jeno cara marehko tangguh yado :

Pun……..!!!!

Na injuk bagini sekindua jak nyemuka kon tangguh haguk beliawan diampai karu, na riakik pangkal ni tangguh sekindua ngimbangko di ngeluleh, na watddo dia tunjuk tawai ni beliawan sai mupatut diampai karu haguk sekindua na kittu wat haga bubuh lapokni tangguh ani beliawan. Na mak cigani disemukakon peserumpokdo ani beliau, na reno dia tangguh sekindua haguk pesekam, kittu wat bubuh lapokni tangguh neram 3-4 jong kak serebok lagi na haga psekam pai dia nyemukakon ya.