Mungkin kik tumbai risok ireh ram nengi bahasa belin, injuk kak beguai dikebun mungkin wat sai harus geluk tiradukon/tiselesaikon berupa tetak-an, punggas-san, unduhan, lilik-an kik disabah reno muneh sai bareh, belinji biasani diguaiko minimal jelema rua telu sai jelas kemujoran muneh kik lebih, kidang kik radu meramik nihan mungkin adu dacok tiucakko jama gelar bareh yaddo bebatok.
Untuk api belinji tiguaiko?. Melamon faktor keuntungan sai dacok timbul jak acara belin diantarani yaddo rasa kebersamaan daleh silaturrahmi, mungkin neram mesurok aga ngeguaiko guayan neram tenggalan uleh faktor neram lagi rasa genalah atau kurang semangat, dipa posisini ditengah kebun mangi jaoh jak suarani jelema ikkah suarani rimba belantara gaoh injuk bunyini binatang-2 atau burung-2 sai lewat di atar rang ram bekerja. Makani perlu rik bekerja untuk bekerja seno yaddo ngurau rik kantik, setelah deni neram selesai maka gileranni deni rik ram rang neram beguai gantian reno mudelni, kidang sinji diatas perjanjian tentuni jadi dacok tiucakko BELIN KIDANG SEUCAK.
Repa muneh sai gelarni belin mak seucak, belin mak seucakji dacok ticontohko jama guai minak mori dipekon, seumpama nayuh, sunatan, atau guai bareh sai sekirani mak diinggok hati injuk model kecadangan/metegor, dilom suatau guaian kak rumpok ngedok guai pastilah neram diurau tian, untuk ngebantu guaian ni tian mani mak mungkin kik dacok beguai tenggalan biasani atas keputusanni minak mori sapa-sapa sai patutni haga ticawako dilom guaian seno na seno lah sai ti tangguhko harus jelema sai bersangkutan haga turuk/ikut dilom guaian seno. Ngehagako rumpok bareh juga pakai tata kerama, kik pandai bebasa ya tipakai bahasa lampung sai mepatut, rik mebangik nengini, dang muneh penyampaianni kik tipehampang injuk zaman tanno ya ti sms ko atau titeleponko gaoh, mani antara sms/telepon jama tenyawaan lain nihan retini walaupun sama-sama nyampai jama tujuan sai dimaksud. Beda nihan dibatin neram juga sai nerimani lain rasani (jadi jama minak mori kik dacok sedacok mungkin tenyawaan/pesan kik berupa guai hadat sai helau ataupun mawek mehelauni tisampako jama cawa lewat utusan wat sai tikayun nyawakeni kik mawek juga betungga ampai pakai alternatif yaddo telepon/sms)
Dilom beguai adu tantu neram rantong haga nulung guai, lain muneh kik ikah ratong ria, bahasa neram lampungni mehampang di keguaini, api juga guaian sai dikayunko tian rumpok sai kedau guaian sedacok mungkin neram ngeguai/ngerja keni jama setulus hati, sepenuh hati, ikhlas, ani tian sai faham agama dilom guaian seno langsung atau tidak langsung masyarakat disekeliling neram pestiti, rik diperhatikon tian dang dikira ulun mawek pestiti di tingkah neram waktu nulung guai. Mani melamon sai ikkah ratong ria, ngudut jama marok-marok injuk mudelni sai tuha jaru, dikayun rumpok kuk ngelemang merabai mepanas, asok dll biasani sinji kik jelema radu bupangkat, jama ngedok duit cutik adu susah ireh dia kik aga tikayun beguai na seno sa kik dacok dang sampai reno, mani duit wat kalani mak dacok nulung neram, reno muneh pangkat jadi lebih penting minak muari sai tiutamako.
Kik neram senemon nulung guai, kak waktu neram beguai neram ngehagako ulun ratong nulung guaian neram reno muneh repa ulah ria uleh waktu seno, mani jelema ji tanno sumang jak injuk tumbai kik tumbai lagi lamon ireh rasa meganggu/mak mebangik diliak ulun jadi halok ganggu lagi ti pakai jadi walaupun jelas2 sai titulung guaianni termasuk dilom jelema sai malas nulung-nulung na lagi ditulung juga guaianni mani minak mori lagi wat rasa ganggu, kidang kik di zaman tanno kupestitiko, kik neram malas nulung rumpok beguai maka rumpok juga malas nulung neram. Na senolah sai gelarni belin, neram nulung ulun, mani suatu saat neram haga ngilu tulung jama ulun muneh untuk nulung guaian neram henolah masih termasuk jama gelarni belin injuk sai ku semukako diatas kidang sai uraian dibahji termasuk dilom sai gelarni BELIN KIDANG MAK SEUCAK.
Tidak ada komentar:
Posting Komentar